Í skóglendi N-Finnlands er að finna talsverð mýrlendi sem myndast á auðum blettum í skóginum, eftir að tré hafa verið höggvin. Á einu slíku svæði var byrjað að spila knattspyrnu á litlum velli. Í upphafi var þetta eingöngu til skemmtunar en þróaðist fljótlega yfir í keppni þar sem lítil mót voru haldin á svæðinu. Fyrir fjórum árum var byrjað að skipuleggja stærra mót í kringum þessa furðulegu íþróttagrein og í stuttu máli er þetta í dag orðið einn stærsti viðburðurinn í N-Finnlandi yfir sumartímann.

270 lið taka þátt í „heimsmeistaramótinu“ og þarna koma saman hátt í 10 þúsund manns í einni allsherjar skemmtihelgi, þar sem menn skemmta sér við mýrarknattspyrnu og ... fleira.

Heimasíða keppninnar er: www.swampsoccer.net

Reglur

Reglurnar eru einfaldar og fylgja í megindráttum venjulegum knattspyrnureglum:

-Spilað er á velli sem er ca. 60m x 35m.

-Leiktími er 2x12 mín.

-Í hverju liði eru sex leikmenn.

-Öllum innköstum og hornum er sparkað inn.

-Markmaður má taka með höndum þrjá metra frá marki (ímynduð lína þvert yfir völlinn).

Skemmtið ykkur vel!