Vellirnir
Vellirnir eru fjórir. Þeir eru merktir númerum frá 1-4. Reynt er að hafa þá sem jafnasta að drulluleika, en það er ekki alltaf hægt; drullan er óútreiknanleg. Þessvegna reynum við líka að láta lið spila helst á öllum völlum, og að sjálfsögðu er skipt um vallarhelming í hálfleik.
Klósett
Gámaþjónusta Vestfjarða reddar fjórum kömrum fyrir keppnisfólk. Keppendur sem ekki hafa enn keppt, og áhorfendur, geta notað klósett tjaldsvæðisins. Gæsla verður við síðarnefndu klósettin til að tryggja að einungis hreint fólk noti klósettin. Strákum og stelpum er bent á að sjálfsögðu má míga útí móa, og út í Tunguá sem rennur niður dalinn, en það verður þá að gerast fyrir neðan baðpollinn.
Þvottur
Tunguá rennur niður dalinn og þar er hægt að baða sig. Mjólkustöðin hefur alltaf verið svo góð að redda fullum tankbíl af heitu vatni. Það er hægt að nota til að skola sig og fá smá yl í kroppinn, en við mælumst til hófstilltrar notkunar.
Sundlaugin á Ísafirði verður opin til 19:00 báða daga, svo aðkomulið geta nýtt sér það fyrir vægt gjald.
Heita vatnið úr mjólkurbílnum gleður.
Bílastæði
Bílastæði eru takmörkuð. Tjaldsvæðisgestum er heimilt að leggja inni á tjaldsvæði. Keppendum má skutla inn að mótsvæði, en bílum má ekki leggja nema við golfskálann og uppi við skíðaskála. Bílastæðaverðir verða á staðnum til að hjálpa til. Ritstjóri mýrarboltavefsins mælir með því að heimamenn komi á hjóli. Þá þarf maður ekki að þrífa sig of vel áður en maður leggur af stað heim, maður festist ekki í bílakös og maður er búinn að hita upp þegar maður mætir á svæðið.
Veitingar
Veitingar verða til sölu, bæði áfengar og óáfengar, bæði fljótandi og í föstu formi. Og sveimér ef þær eru ekki bæði til í heitu og köldu. Hvað það verður veit nú enginn enn, en bjór, samlokur, kakó og þessháttar er hægt að treysta á.
Áhorfendur
Áhorfendur eru velkomnir. Komið endilega labbandi síðasta spölinn til að fylla ekki bílastæðin. Og munið að það er líklegt að maður óhreinkist nokkuð af því að rekast í foruga þátttakendur eða fá bolta beint í smettið.
Sjá einnig Spurt og svarað.